tanha kab hun mere sang parinde hain

tanhā kab huuñ mere sang parinde haiñ

sapne bhī to rangā-rang parinde haiñ

mujh ko baiThā dekh ke jumle kaste the

mere uḌne par ab dang parinde haiñ

phir se ka.aba ik dushman kī zad par hai

phir lashkar se mahv-e-jang parinde haiñ

tere saath haiñ shahr kī puḳhta dīvāreñ

maiñ sādhū huuñ mere sang parinde haiñ

tere lahje kī tasvīrī shakleñ haiñ

jitne bhī uḌte ḳhush-rang parinde haiñ

pinjroñ kī bohtāt gavāhī detī hai

insānoñ ke hāthoñ tang parinde haiñ

sab kuchh hai bas terī ek kamī sī hai

bādal paanī dhuup patang parinde haiñ

be-ḳhud sī vo har-sū uḌtī phirtī hai

us ke 'āsif' saare ang parinde haiñ

tanha kab hun mere sang parinde hain

sapne bhi to ranga-rang parinde hain

mujh ko baiTha dekh ke jumle kaste the

mere uDne par ab dang parinde hain

phir se kaba ek dushman ki zad par hai

phir lashkar se mahw-e-jang parinde hain

tere sath hain shahr ki puKHta diwaren

main sadhu hun mere sang parinde hain

tere lahje ki taswiri shaklen hain

jitne bhi uDte KHush-rang parinde hain

pinjron ki bohtat gawahi deti hai

insanon ke hathon tang parinde hain

sab kuchh hai bas teri ek kami si hai

baadal pani dhup patang parinde hain

be-KHud si wo har-su uDti phirti hai

us ke 'asif' sare ang parinde hain