tanha qamar ko chhoD ke tare chale gae

tanhā qamar ko chhoḌ ke taare chale ga.e

ġhurbat meñ jaise yaar hamāre chale ga.e

ham zindagī ko aise guzāre chale ga.e

jaise ki koī qarz utāre chale ga.e

tum kyā badal ga.e ki zamāna badal gayā

ḳhush-qismatī ke saare sitāre chale ga.e

jo phal gire zamīñ pe vo yāroñ ne chun liye

ham pattharoñ ko peḌ pe maare chale ga.e

us ne baḌe fareb se har shart jiit lī

ham bhī baḌe ḳhulūs se haare chale ga.e

ab mausam-e-bahār bhī dene lagā fareb

āñkhoñ kī taab le ke nazāre chale ga.e

vo kyā ga.e ki ġhazleñ bhī be-jān ho ga.iiñ

sab ramz sab kinā.e ishāre chale ga.e

is se ziyāda ham se ta.ayyush na ho sakā

gaañv ga.e to nahr kināre chale ga.e

manzar-kashī kuchh aisī kī vaa.iz ne hashr kī

masjid ko ham bhī ḳhauf ke maare chale ga.e

un kī jafā vafā meñ na tabdīl ho sakī

ham jān-o-dil kī nazr guzāre chale ga.e

āñkheñ khulīñ to dhuup thī har sū vahī 'suhaib'

ḳhvāboñ ke sab hasīn nazāre chale ga.e

tanha qamar ko chhoD ke tare chale gae

ghurbat mein jaise yar hamare chale gae

hum zindagi ko aise guzare chale gae

jaise ki koi qarz utare chale gae

tum kya badal gae ki zamana badal gaya

KHush-qismati ke sare sitare chale gae

jo phal gire zamin pe wo yaron ne chun liye

hum pattharon ko peD pe mare chale gae

us ne baDe fareb se har shart jit li

hum bhi baDe KHulus se haare chale gae

ab mausam-e-bahaar bhi dene laga fareb

aankhon ki tab le ke nazare chale gae

wo kya gae ki ghazlen bhi be-jaan ho gain

sab ramz sab kinae ishaare chale gae

is se ziyaada hum se tayyush na ho saka

ganw gae to nahr kinare chale gae

manzar-kashi kuchh aisi ki waiz ne hashr ki

masjid ko hum bhi KHauf ke mare chale gae

un ki jafa wafa mein na tabdil ho saki

hum jaan-o-dil ki nazr guzare chale gae

aankhen khulin to dhup thi har su wahi 'suhaib'

KHwabon ke sab hasin nazare chale gae