tanha safar mein chalne ki aadat tujhe bhi ho

tanhā safar meñ chalne kī aadat tujhe bhī ho

vīrān maqbaroñ se aqīdat tujhe bhī ho

yaḳh-basta shab guzār kabhī tū bhī hijr meñ

merī tarah kisī se mavaddat tujhe bhī ho

tujh se bichhaḌ ke kitnā hasīñ ho gayā huuñ maiñ

aa sāmne ki thoḌī sī hairat tujhe bhī ho

maiñ chāhtā nahīñ ki tirī aañkh nam rahe

maiñ chāhtā nahīñ ki aziyyat tujhe bhī ho

maiñ chāhtā nahīñ ki tire dil meñ ḳhauf ho

thoḌī sī zindagī se shikāyat tujhe bhī ho

tū mujh ko apnī zaat se yaksar na kar judā

aisā na ho ki ḳhaak se vahshat tujhe bhī ho

behtar hai ḳhāmushī se bichhaḌ jaa.eñ ek din

mumkin hai fāsloñ kī zarūrat tujhe bhī ho

mujh ko bhī koī kaam nahīñ āj-kal 'razā'

mumkin hai in dinoñ koī fursat tujhe bhī ho

tanha safar mein chalne ki aadat tujhe bhi ho

viran maqbaron se aqidat tujhe bhi ho

yaKH-basta shab guzar kabhi tu bhi hijr mein

meri tarah kisi se mawaddat tujhe bhi ho

tujh se bichhaD ke kitna hasin ho gaya hun main

aa samne ki thoDi si hairat tujhe bhi ho

main chahta nahin ki teri aankh nam rahe

main chahta nahin ki aziyyat tujhe bhi ho

main chahta nahin ki tere dil mein KHauf ho

thoDi si zindagi se shikayat tujhe bhi ho

tu mujh ko apni zat se yaksar na kar juda

aisa na ho ki KHak se wahshat tujhe bhi ho

behtar hai KHamushi se bichhaD jaen ek din

mumkin hai faslon ki zarurat tujhe bhi ho

mujh ko bhi koi kaam nahin aaj-kal 'raza'

mumkin hai in dinon koi fursat tujhe bhi ho