tanhai ka bojh uThaun kab tak aaKHir aaKHir kab tak

tanhā.ī kā bojh uThā.ūñ kab tak āḳhir āḳhir kab tak

yaad meñ un kī ashk bahā.ūñ kab tak āḳhir āḳhir kab tak

koī nahīñ hai duniyā meñ jo mere dil kī baat ko samjhe

ġhairoñ ko afsāna sunā.ūñ kab tak āḳhir āḳhir kab tak

raat kī khetī ko sūraj kī tez shuā.eñ khā jaatī haiñ

ḳhvāboñ kī maiñ fasal ugā.ūñ kab tak āḳhir āḳhir kab tak

kaalī raat meñ shoḳh havā.eñ zulm se baaz aatī hī nahīñ haiñ

maiñ rāhoñ meñ sham.a jalā.ūñ kab tak āḳhir āḳhir kab tak

māyūsī kī kaalī āñdhī har dam taak meñ hī rahtī hai

ummīdoñ ke diip jalā.ūñ kab tak āḳhir āḳhir kab tak

merī sadā.eñ sar Takrā kar aahoñ meñ Dhal Dhal jaatī haiñ

dīvāroñ ko giit sunā.ūñ kab tak āḳhir āḳhir kab tak

sang-e-malāmat dil par mere barsātī hai duniyā 'shātir'

choT lage aur hañstā jā.ūñ kab tak āḳhir āḳhir kab tak

tanhai ka bojh uThaun kab tak aaKHir aaKHir kab tak

yaad mein un ki ashk bahaun kab tak aaKHir aaKHir kab tak

koi nahin hai duniya mein jo mere dil ki baat ko samjhe

ghairon ko afsana sunaun kab tak aaKHir aaKHir kab tak

raat ki kheti ko suraj ki tez shuaen kha jati hain

KHwabon ki main fasal ugaun kab tak aaKHir aaKHir kab tak

kali raat mein shoKH hawaen zulm se baz aati hi nahin hain

main rahon mein shama jalaun kab tak aaKHir aaKHir kab tak

mayusi ki kali aandhi har dam tak mein hi rahti hai

ummidon ke dip jalaun kab tak aaKHir aaKHir kab tak

meri sadaen sar Takra kar aahon mein Dhal Dhal jati hain

diwaron ko git sunaun kab tak aaKHir aaKHir kab tak

sang-e-malamat dil par mere barsati hai duniya 'shatir'

choT lage aur hansta jaun kab tak aaKHir aaKHir kab tak