tanhai ke aalam mein hoti hai basar apni

tanhā.ī ke aalam meñ hotī hai basar apnī

ābād hai barsoñ se vīrānī-e-dar apnī

kis aag se ThanDī ho sīmābī-e-shauq-e-dil

kis dar pe ye sar phoḌe betābi-e-sar apnī

ye donoñ jahāñ DhūñDe ḳhud ko na magar paayā

kyā jāneñ kahāñ se ab aa.egī ḳhabar apnī

shāyān-e-junūñ kam haiñ ye donoñ jahāñ mil kar

vo rāhguzar apnī ye rāhguzar apnī

jis jā se chale the ham hir-phir ke vahīñ pahuñche

ab aur sunā.eñ kyā rūdād-e-safar apnī

ruḳhsār kī tābānī zulfoñ ke ghane saa.e

ye shaam bhī apnī hai vo bhī thī sahar apnī

jo kuchh bhī nazar aaya vo kitnā ġhalat Thahrā

pardoñ hī se Takrā.ī nākām nazar apnī

har gaam se aage thī tā-hadd-e-nazar manzil

kis gaam pe dam legī manzil-ba-safar apnī

nafrat kī fazāoñ meñ sadiyoñ ke añdheroñ meñ

ik ishq kā lamha thī ye umr-e-sharar apnī

tanhai ke aalam mein hoti hai basar apni

aabaad hai barson se virani-e-dar apni

kis aag se ThanDi ho simabi-e-shauq-e-dil

kis dar pe ye sar phoDe betabi-e-sar apni

ye donon jahan DhunDe KHud ko na magar paya

kya jaanen kahan se ab aaegi KHabar apni

shayan-e-junun kam hain ye donon jahan mil kar

wo rahguzar apni ye rahguzar apni

jis ja se chale the hum hir-phir ke wahin pahunche

ab aur sunaen kya rudad-e-safar apni

ruKHsar ki tabani zulfon ke ghane sae

ye sham bhi apni hai wo bhi thi sahar apni

jo kuchh bhi nazar aaya wo kitna ghalat Thahra

pardon hi se Takrai nakaam nazar apni

har gam se aage thi ta-hadd-e-nazar manzil

kis gam pe dam legi manzil-ba-safar apni

nafrat ki fazaon mein sadiyon ke andheron mein

ek ishq ka lamha thi ye umr-e-sharar apni