tanhai ke shoalon pe machalne ke liye tha

tanhā.ī ke sho.aloñ pe machalne ke liye thā

kyā mujh sā javāñ aag meñ jalne ke liye thā

kyā kātib-e-taqdīr se zaḳhmoñ kī shikāyat

jo tiir thā tarkash meñ so chalne ke liye thā

jaltā hai mire dil meñ paḌā daaġh kī sūrat

jo chāñd sar-e-arsh nikalne ke liye thā

is jhiil meñ tujh se bhī koī lahr na uThī

aur tū mirī taqdīr badalne ke liye thā

māyūs na jā aa ġham-e-daurāñ mire nazdīk

tū hī mirī bāñhoñ meñ machalne ke liye thā

ye Dastī huī raat guzar jā.egī yaaro

vo hañstā huā din bhī to Dhalne ke liye thā

kuchh aañch mire lams kī garmī se bhī pahuñchī

vo barf sā paikar bhī pighalne ke liye thā

tafrīq ne mulkoñ kī tarāshe haiñ aqā.ed

insān bas ik raah pe chalne ke liye thā

zinda hai mirī fikr mire karb se 'zulfī'

ye phuul isī shāḳh pe phalne ke liye thā

tanhai ke shoalon pe machalne ke liye tha

kya mujh sa jawan aag mein jalne ke liye tha

kya katib-e-taqdir se zaKHmon ki shikayat

jo tir tha tarkash mein so chalne ke liye tha

jalta hai mere dil mein paDa dagh ki surat

jo chand sar-e-arsh nikalne ke liye tha

is jhil mein tujh se bhi koi lahr na uThi

aur tu meri taqdir badalne ke liye tha

mayus na ja aa gham-e-dauran mere nazdik

tu hi meri banhon mein machalne ke liye tha

ye Dasti hui raat guzar jaegi yaro

wo hansta hua din bhi to Dhalne ke liye tha

kuchh aanch mere lams ki garmi se bhi pahunchi

wo barf sa paikar bhi pighalne ke liye tha

tafriq ne mulkon ki tarashe hain aqaed

insan bas ek rah pe chalne ke liye tha

zinda hai meri fikr mere karb se 'zulfi'

ye phul isi shaKH pe phalne ke liye tha