tanhaiyon ka habs mujhe kaTta raha

tanhā.iyoñ kā habs mujhe kāTtā rahā

mujh tak pahuñch sakī na tire shahr kī havā

vo qahqahoñ kī sej pe baiThā huā milā

maiñ jis ke dar pe dard kī bārāt le gayā

ik umr justujū meñ guzārī to ye khulā

vo mere paas thā maiñ jise DhūñDhtā rahā

niklā huuñ lafz lafz se maiñ Duub Duub kar

ye terā ḳhat hai yā koī dariyā chaḌhā huā

nazreñ mileñ to vaqt kī raftār tham ga.ī

nāzuk se ek lamhe pe sadiyoñ kā bojh thā

maiñ ne baḌhā ke haath use chhū liyā 'rashīd'

itnā qarīb aaj mire chāñd aa gayā

tanhaiyon ka habs mujhe kaTta raha

mujh tak pahunch saki na tere shahr ki hawa

wo qahqahon ki sej pe baiTha hua mila

main jis ke dar pe dard ki baraat le gaya

ek umr justuju mein guzari to ye khula

wo mere pas tha main jise DhunDhta raha

nikla hun lafz lafz se main Dub Dub kar

ye tera KHat hai ya koi dariya chaDha hua

nazren milen to waqt ki raftar tham gai

nazuk se ek lamhe pe sadiyon ka bojh tha

main ne baDha ke hath use chhu liya 'rashid'

itna qarib aaj mere chand aa gaya