mujhe us se koi KHatra nahin hai

mujhe us se koī ḳhatra nahīñ hai

ki merā dost mujh jaisā nahīñ hai

ye kis bastī meñ le aayā hai rasta

daraḳhtoñ kā jahāñ saaya nahīñ hai

havā Dar Dar ke chaltī hai yahāñ par

yahāñ dariyā hai jo bahtā nahīñ hai

kisī chehre se lab khurche hue haiñ

kisī āvāz kā chehra nahīñ hai

vo but bhī ab parastish māñgtā hai

abhī patthar se jo niklā nahīñ hai

miyāñ taḳhtī ko chhoḌo is makāñ meñ

koī is naam kā rahtā nahīñ hai

likhā rakkhā hai 'ahd-e-tark-e-ulfat

magar dil dastaḳhat kartā nahīñ hai

qayāmat hai ki merī dāstāñ meñ

koī bhī vāqi'a merā nahīñ hai

mujhe us se koi KHatra nahin hai

ki mera dost mujh jaisa nahin hai

ye kis basti mein le aaya hai rasta

daraKHton ka jahan saya nahin hai

hawa Dar Dar ke chalti hai yahan par

yahan dariya hai jo bahta nahin hai

kisi chehre se lab khurche hue hain

kisi aawaz ka chehra nahin hai

wo but bhi ab parastish mangta hai

abhi patthar se jo nikla nahin hai

miyan taKHti ko chhoDo is makan mein

koi is nam ka rahta nahin hai

likha rakkha hai 'ahd-e-tark-e-ulfat

magar dil dastaKHat karta nahin hai

qayamat hai ki meri dastan mein

koi bhi waqi'a mera nahin hai