tapish se phir naghma-e-junun ki surud-o-chang-o-rabab TuTe

tapish se phir naġhma-e-junūñ kī surūd-o-chañg-o-rabāb TuuTe

kisī haqīqat ke ek sañg-e-girāñ se Takrā ke ḳhvāb TuuTe

hayāt kī jū-e-dard-o-ġham meñ safīne ummīd-o-ārzū ke

ba-shakl-e-mauj-e-nasīm ubhre ba-rañg-e-jism-e-habāb TuuTe

sunā rahī haiñ vafā kī rāheñ shikast-e-parvāz kā fasāna

ki duur tak vādī-e-talab meñ paḌe haiñ har samt ḳhvāb TuuTe

barahna-pā aao tum bhī hamdam bas ab to sahrā-e-ārzū meñ

tamāzat-e-reg-e-āgahī se tilism-e-mauj-e-sarāb TuuTe

yahī hai gar bazm-e-mai-gusārāñ to shart-e-sad-ehtiyāt kyuuñ ho

kisī ke hāthoñ meñ jaam chhalke kisī kā band-e-naqāb TuuTe

chaTaḳh rahe haiñ diloñ ke sāġhar magar ye farmān-e-chāragar hai

na koī chashm-e-pur-āb chhalke na koī jām-e-sharāb TuuTe

tapish se phir naghma-e-junun ki surud-o-chang-o-rabab TuTe

kisi haqiqat ke ek sang-e-giran se Takra ke KHwab TuTe

hayat ki ju-e-dard-o-gham mein safine ummid-o-arzu ke

ba-shakl-e-mauj-e-nasim ubhre ba-rang-e-jism-e-habab TuTe

suna rahi hain wafa ki rahen shikast-e-parwaz ka fasana

ki dur tak wadi-e-talab mein paDe hain har samt KHwab TuTe

barahna-pa aao tum bhi hamdam bas ab to sahra-e-arzu mein

tamazat-e-reg-e-agahi se tilism-e-mauj-e-sarab TuTe

yahi hai gar bazm-e-mai-gusaran to shart-e-sad-ehtiyat kyun ho

kisi ke hathon mein jam chhalke kisi ka band-e-naqab TuTe

chaTaKH rahe hain dilon ke saghar magar ye farman-e-chaaragar hai

na koi chashm-e-pur-ab chhalke na koi jam-e-sharab TuTe