تپتے ہوئے صحرا میں شجر ڈھونڈ رہا ہوں

تپتے ہوئے صحرا میں شجر ڈھونڈ رہا ہوں

کوئی تو ملے اہل نظر ڈھونڈ رہا ہوں

کیا بات ہے جو بات ہی بنتی نہیں اپنی

میں اپنی دعاؤں میں اثر ڈھونڈ رہا ہوں

وہ ایک نظر چیر کے رکھ دے جو جگر کو

محفل میں وہی تیر نظر ڈھونڈ رہا ہوں

سوئی سوئی موجوں میں جو ہلچل سی مچا دے

طوفانوں میں وہ زیر و زبر ڈھونڈ رہا ہوں

حالات نے ہر چیز کی پہچان مٹا دی

میں گاؤں میں اب اپنا ہی گھر ڈھونڈ رہا ہوں

اعلان صداقت کا امیں بن کے اٹھے جو

نیزے پہ مجیدؔ آج وہ سر ڈھونڈ رہا ہوں