تپتے ہوئے صحرا میں شجر ڈھونڈ رہا ہوں

تپتے ہوئے صحرا میں شجر ڈھونڈ رہا ہوں

ملنا ہے گو دشوار مگر ڈھونڈ رہا ہوں

سوکھے ہوئے پتے بھی نہیں جن کے بدن پر

میں ایسے درختوں پہ ثمر ڈھونڈ رہا ہوں

یہ دشت جہالت ہے یہاں کفر ہے ادراک

اس دشت میں کیوں علم و ہنر ڈھونڈ رہا ہوں

دنیا تو بہت تنگ ہوئی جاتی ہے یارو

یہ سوچ کے افلاک میں گھر ڈھونڈ رہا ہوں

تخئیل کی پرواز کو جو شعر میں ڈھالے

اخبار میں اک ایسی خبر ڈھونڈ رہا ہوں

تنگ آ کے غضب ناک اندھیروں کے سفر سے

میں شادؔ اجالوں کی ڈگر ڈھونڈ رہا ہوں