تقدیر‌‌ عشق آہ و فغاں کے سوا ہے کیا

تقدیر‌‌ عشق آہ و فغاں کے سوا ہے کیا

فرمائیے کہ آہ و فغاں ناروا ہے کیا

رنگینئ جہاں بھی ہے کس درجہ دل فریب

اور وقت بے نیاز بھی سیماب پا ہے کیا

اے لطف ناتمام ترے لطف کے نثار

جز درد حسرت دل درد آشنا ہے کیا

مجھ سے یہ کہہ رہا ہے کہ توبہ کی فکر کر

ابر سیاہ مے کدہ پر چھا گیا ہے کیا

میرے جگر کے داغ کی عظمت نہ پوچھیے

اس کے حضور لالۂ آتش قبا ہے کیا

دامن ہے تار تار کبھی دل ہے چاک چاک

فطرتؔ تمہارے درد جنوں کی دوا ہے کیا