taqdir-e-shama jalwa-e-jaanana ban gaya

taqdīr-e-sham.a jalva-e-jānāna ban gayā

sho.ala uThā jo us se to pardā na ban gayā

jo hāl-e-dil thā kaif meñ tāsīr-e-dard thā

vo kahte kahte shauq kā afsāna ban gayā

jannat kī aarzū se hai jannat kā kal vajūd

vīrāna kah diyā jise vīrāna ban gayā

yak qatra dil thā mast kā paimāna-e-nasīb

saaqī ne kī nigāh to mai-ḳhāna ban gayā

mauqa.a-shanās husn-e-mohabbat ke baab meñ

apnā thā aur hashr meñ begāna ban gayā

us kī talab meñ jab na rahā us kā kuchh lihāz

andāz-e-be-qarār gadāyāna ban gayā

yuuñ apne dar se Taal diyā us ke naaz ne

andāz-e-lutf-e-ḳhās karīmāna ban gayā

'kaifī' haram ke dar pe thā jo kuchh vo faiz thā

haañ but-kade meñ sajda-e-shukrāna ban gayā

taqdir-e-shama jalwa-e-jaanana ban gaya

shoala uTha jo us se to parda na ban gaya

jo haal-e-dil tha kaif mein tasir-e-dard tha

wo kahte kahte shauq ka afsana ban gaya

jannat ki aarzu se hai jannat ka kal wajud

virana kah diya jise virana ban gaya

yak qatra dil tha mast ka paimana-e-nasib

saqi ne ki nigah to mai-KHana ban gaya

mauqa-shanas husn-e-mohabbat ke bab mein

apna tha aur hashr mein begana ban gaya

us ki talab mein jab na raha us ka kuchh lihaz

andaz-e-be-qarar gadayana ban gaya

yun apne dar se Tal diya us ke naz ne

andaz-e-lutf-e-KHas karimana ban gaya

'kaifi' haram ke dar pe tha jo kuchh wo faiz tha

han but-kade mein sajda-e-shukrana ban gaya