taqdir pe shakir rah kar bhi ye kaun kahe tadbir na kar

taqdīr pe shākir rah kar bhī ye kaun kahe tadbīr na kar

vā bāb-e-ijābat ho ki na ho zanjīr hilā tāḳhīr na kar

ġham baḌhne de ai dil aur zarā jāñch aah kī be-tāsīr na kar

hai ḳhvāb adhūrā aap abhī be-samjhe ġhalat ta.abīr na kar

jab zulm kā badla zulm huā mazlūm kā haq kuchh bhī na rahā

de dard hī meñ lazzat yārab naale ko atā tāsīr na kar

ho laakh kamān kaḌī qātil kuchh jazb nishāne meñ bhī hai

baazū ke bal pe nazar kar ke andāza-e-zaḳhm-e-tīr na kar

ab tak jo nigāheñ sīdhī haiñ mumkin hai kal ye palaT jaa.eñ

jo karnā ho kare aise meñ kis soch meñ hai tāḳhīr na kar

paimān-e-mohabbat ḳhatm huā ab zikr se us ke fā.eda kyā

muñh bikhrī kaḌiyoñ ke na milā tayyār na.ī zanjīr na kar

ulfat ke ahd-e-mohkam meñ buude kāġhaz kī zamānat kyā

ye dil se dil kī bāteñ haiñ rakh yaad faqat tahrīr na kar

har dil hai hayāt kā sarmāya har dil meñ josh mohabbat kā

tū 'ārzū' aur kahegā kyā bas rahne bhī de taqrīr na kar

taqdir pe shakir rah kar bhi ye kaun kahe tadbir na kar

wa bab-e-ijabat ho ki na ho zanjir hila taKHir na kar

gham baDhne de ai dil aur zara jaanch aah ki be-tasir na kar

hai KHwab adhura aap abhi be-samjhe ghalat tabir na kar

jab zulm ka badla zulm hua mazlum ka haq kuchh bhi na raha

de dard hi mein lazzat yarab nale ko ata tasir na kar

ho lakh kaman kaDi qatil kuchh jazb nishane mein bhi hai

bazu ke bal pe nazar kar ke andaza-e-zaKHm-e-tir na kar

ab tak jo nigahen sidhi hain mumkin hai kal ye palaT jaen

jo karna ho kare aise mein kis soch mein hai taKHir na kar

paiman-e-mohabbat KHatm hua ab zikr se us ke faeda kya

munh bikhri kaDiyon ke na mila tayyar nai zanjir na kar

ulfat ke ahd-e-mohkam mein bude kaghaz ki zamanat kya

ye dil se dil ki baaten hain rakh yaad faqat tahrir na kar

har dil hai hayat ka sarmaya har dil mein josh mohabbat ka

tu 'arzu' aur kahega kya bas rahne bhi de taqrir na kar