tarasha hai tujhe jis ne laDakpan mein jawani mein

tarāshā hai tujhe jis ne laḌakpan meñ javānī meñ

hamesha yaad rakhnā tū use apnī kahānī meñ

bharosa naam kī shai ne mujhe kuchh is tarah luuTā

jise denā thā gul us ne diye kāñTe nishānī meñ

tirī ḳhātir abhī zinda hai jis kī aañkh kā paanī

Dubo saktā nahīñ hargiz vo terā naam paanī meñ

hameñ 'unvān honā chāhiye thā jis kahānī kā

hamārā zikr tak hotā nahīñ hai us kahānī meñ

ḳhushī ke mauqa' par aañsū nahīñ vo rok paatā hai

mile hoñ har ghaḌī aañsū jise is zindagānī meñ

maiñ sāhil kā huuñ bāshinda mirā mushkil hai bach paanā

bahā le jā.egā dariyā mujhe apnī ravānī meñ

jise hāsil nahīñ hotā kabhī bhī peT-bhar bhojan

bhalā kaise chalātā hogā ghar itnī girānī meñ

tarasha hai tujhe jis ne laDakpan mein jawani mein

hamesha yaad rakhna tu use apni kahani mein

bharosa nam ki shai ne mujhe kuchh is tarah luTa

jise dena tha gul us ne diye kanTe nishani mein

teri KHatir abhi zinda hai jis ki aankh ka pani

Dubo sakta nahin hargiz wo tera nam pani mein

hamein 'unwan hona chahiye tha jis kahani ka

hamara zikr tak hota nahin hai us kahani mein

KHushi ke mauqa' par aansu nahin wo rok pata hai

mile hon har ghaDi aansu jise is zindagani mein

main sahil ka hun bashinda mera mushkil hai bach pana

baha le jaega dariya mujhe apni rawani mein

jise hasil nahin hota kabhi bhi peT-bhar bhojan

bhala kaise chalata hoga ghar itni girani mein