tarah tarah se wazahat ki baat ki usne

tarah tarah se vazāhat kī baat kī us ne

ghumā-phirā ke mohabbat kī baat kī us ne

havāoñ se bhī kahā ḳhvāb dekhne ke liye

charāġh se bhī suhūlat kī baat kī us ne

fasurdagī ko fasāne kā ruup dete hue

hikāyatoñ se haqīqat kī baat kī us ne

mujhe gavāh zarūrat hai is adālat meñ

kabhī kisī se niyābat kī baat kī us ne

vo yuuñ jo lauTnā chāhe use suhūlat ho

diyā bujhā ke himāyat kī baat kī us ne

tamām sarv nigūñ-sār the pahāḌoñ par

achānak us qad-o-qāmat kī baat kī us ne

paḌe hī rah ga.e 'jāved' ham burīda qadam

gale lagā ke jo ruḳhsat kī baat kī us ne

tarah tarah se wazahat ki baat ki us ne

ghuma-phira ke mohabbat ki baat ki us ne

hawaon se bhi kaha KHwab dekhne ke liye

charagh se bhi suhulat ki baat ki us ne

fasurdagi ko fasane ka rup dete hue

hikayaton se haqiqat ki baat ki us ne

mujhe gawah zarurat hai is adalat mein

kabhi kisi se niyabat ki baat ki us ne

wo yun jo lauTna chahe use suhulat ho

diya bujha ke himayat ki baat ki us ne

tamam sarw nigun-sar the pahaDon par

achanak us qad-o-qamat ki baat ki us ne

paDe hi rah gae 'jawed' hum burida qadam

gale laga ke jo ruKHsat ki baat ki us ne