tarannum mein gawayye ki tarah se tan paida kar

tarannum meñ gavayye kī tarah se taan paidā kar

na.e andāz se sheroñ meñ apne jaan paidā kar

agar tū kaanā raaja hai to andhoñ kā banā halqa

tū apnī shā.irī ke vāste maidān paidā kar

agar mash.hūr honā hai to apnī jeb kar ḳhālī

kahīñ se ġhair matbūā koī dīvān paidā kar

rakh apne haath meñ patte sharāb-o-jām chausar bhī

mire hamdam safar ke vāste sāmān paidā kar

hathelī meñ dikhā jannat murīdoñ ko hī ai murshid

haqīqat meñ hai daanā to koī nādān paidā kar

agar phD karnī ho to achchhe guide ko chun le

adab meñ degrē le kar ik nayā haijān paidā kar

hamārī shā.irī ko jāñchnā hī hai agar nāqid

to sudh-budh shā.irī kī sher kī pahchān paidā kar

jo kahlānā ho shā.ir to na kah ash.ār nā-mauzūñ

kam-az-kam shā.irī meñ vazn kī tū jaan paidā kar

'rahīm' ālām kā had-e-nazar tak ik samundar hai

ho mumkin to ḳhushī kā is meñ ik tūfān paidā kar

tarannum mein gawayye ki tarah se tan paida kar

nae andaz se sheron mein apne jaan paida kar

agar tu kana raja hai to andhon ka bana halqa

tu apni shairi ke waste maidan paida kar

agar mashhur hona hai to apni jeb kar KHali

kahin se ghair matbua koi diwan paida kar

rakh apne hath mein patte sharab-o-jam chausar bhi

mere hamdam safar ke waste saman paida kar

hatheli mein dikha jannat muridon ko hi ai murshid

haqiqat mein hai dana to koi nadan paida kar

agar phD karni ho to achchhe guide ko chun le

adab mein degree le kar ek naya haijaan paida kar

hamari shairi ko jaanchna hi hai agar naqid

to sudh-budh shairi ki sher ki pahchan paida kar

jo kahlana ho shair to na kah ashaar na-mauzun

kam-az-kam shairi mein wazn ki tu jaan paida kar

'rahim' aalam ka had-e-nazar tak ek samundar hai

ho mumkin to KHushi ka is mein ek tufan paida kar