taras raha hun qarar-e-dil-o-nazar ke liye

taras rahā huuñ qarār-e-dil-o-nazar ke liye

sukūt-e-shab meñ duā jis tarah sahar ke liye

maiñ ḳhāk-e-rāh-guzar huuñ ki masnad-e-gul huuñ

ik iztirāb-e-musalsal hai umr bhar ke liye

shajar ki jin se udāsī Tapaktī rahtī hai

ye sañg-e-mīl haiñ shāyad mirī nazar ke liye

jamāl-e-dost ko mash.al banā liyā maiñ ne

vafā ki raḳht-e-safar hai mire safar ke liye

tire ḳhayāl kā aivāñ lahū se raushan hai

mirī nazar kā ujālā hai rahguzar ke liye

shikast jis se zamāna laraztā rahtā hai

vahī naved-e-masarrat bhī hai 'zafar' ke liye

taras raha hun qarar-e-dil-o-nazar ke liye

sukut-e-shab mein dua jis tarah sahar ke liye

main KHak-e-rah-guzar hun ki masnad-e-gul hun

ek iztirab-e-musalsal hai umr bhar ke liye

shajar ki jin se udasi Tapakti rahti hai

ye sang-e-mil hain shayad meri nazar ke liye

jamal-e-dost ko mashal bana liya main ne

wafa ki raKHt-e-safar hai mere safar ke liye

tere KHayal ka aiwan lahu se raushan hai

meri nazar ka ujala hai rahguzar ke liye

shikast jis se zamana larazta rahta hai

wahi nawed-e-masarrat bhi hai 'zafar' ke liye