tariq-e-ishq mein adnesha-e-ziyan na raha

tarīq-e-ishq meñ adnesha-e-ziyāñ na rahā

usī kā naam rahā jis kā kuchh nishāñ na rahā

kahīñ guloñ meñ kahīñ mehr-o-māh-o-anjum meñ

nazar nazar ke liye vo kahāñ kahāñ na rahā

liye the baḌh ke qadam jis ke qurb-e-manzil ne

vo kārvāñ na rahā mīr-e-kārvāñ na rahā

jinhoñ ne ḳhuun se kī ābiyārī-e-gulshan

unhīñ kā sehn-e-gulistāñ meñ āshiyāñ na rahā

ye sāneha hai ki rāheñ to haiñ na.ī lekin

kisī usuul pe dastūr-e-kārvāñ na rahā

nazar-navāz thā jab manzar-e-gul-o-ġhuncha

chaman meñ aglī bahāroñ kā vo samāñ na rahā

vo din bhī the ki ta.alluq thā ham-navāoñ se

ye vaqt bhī hai ki ab koī ham-zabāñ na rahā

hameñ bhī ab to ye harf-e-ġhalat sā lagtā hai

hamārā naam ki jo zeb-e-dāstāñ na rahā

diyā thā naam jise rāh-o-rasm-e-ulfat kā

'rishī' vo mashġhala-e-sa.ī-e-rā.egāñ na rahā

tariq-e-ishq mein adnesha-e-ziyan na raha

usi ka nam raha jis ka kuchh nishan na raha

kahin gulon mein kahin mehr-o-mah-o-anjum mein

nazar nazar ke liye wo kahan kahan na raha

liye the baDh ke qadam jis ke qurb-e-manzil ne

wo karwan na raha mir-e-karwan na raha

jinhon ne KHun se ki aabiyari-e-gulshan

unhin ka sehn-e-gulistan mein aashiyan na raha

ye saneha hai ki rahen to hain nai lekin

kisi usul pe dastur-e-karwan na raha

nazar-nawaz tha jab manzar-e-gul-o-ghuncha

chaman mein agli bahaaron ka wo saman na raha

wo din bhi the ki talluq tha ham-nawaon se

ye waqt bhi hai ki ab koi ham-zaban na raha

hamein bhi ab to ye harf-e-ghalat sa lagta hai

hamara nam ki jo zeb-e-dastan na raha

diya tha nam jise rah-o-rasm-e-ulfat ka

'rishi' wo mashghala-e-sai-e-raegan na raha