tark-e-lazzat pe mail jo ba-zahir hai mizaj

tark-e-lazzāt pe maa.il jo ba-zāhir hai mizāj

aaj to bagulā-bhagat jaise bane haiñ mahrāj

husn-e-maġhrūr o siyah-fām kā kaise ho ilaaj

shakl-o-sūrat to chuḌeloñ kī hai pariyoñ ke mizāj

chhoḌ aa.e haram-e-pāk meñ jins-e-īmāñ

laad kar lā na sake jab ki vatan tak hujjāj

aise bhī bānī-e-be-dād haiñ kuchh duniyā meñ

falak-e-pīr bhī detā hai jinheñ jhuk ke ḳhirāj

husn kī jitnī zamīñ hotī hai nā-qābil-e-kāsht

ishq paidā kiyā kartā hai sadā sab meñ anaaj

sab kuchh allāh ne de rakkhā hai māl-o-zar-o-sīm

haiñ magar ahl-e-duval aql-o-ḳhirad ke muhtāj

is ke aa.iin nahīñ ab jo amal ke qābil

to ise kar do retire ki purānā hai samāj

jab kabhī log taraqqī kī taraf baḌhte haiñ

Taañg uḌā dete haiñ kambaḳht yahī rasm-o-rivāj

haa.e kyā pūchhte ho murda diloñ kā ahvāl

miyāñ zinda haiñ magar beva haiñ un kī azvāj

nā-ḳhudā.ī kiyā kartā hai talātum ḳhud hī

khetī haiñ aap hī aa kar mirī kashtī amvāj

chain se shaiḳh-e-haram umr basar karte haiñ

rūpaya bank meñ hai miltā hai māhāna byaaj

kaag uḌ uḌ ke ye botal ke sadā dete haiñ

nashsha-bandī kī sunā hai koī mēting hai aaj

ab tū jo chāhe kare ishq-e-vatan meñ ai 'shauq'

husn kuchh bol nahīñ saktā hai de kar saurāj

tark-e-lazzat pe mail jo ba-zahir hai mizaj

aaj to bagula-bhagat jaise bane hain mahraj

husn-e-maghrur o siyah-fam ka kaise ho ilaj

shakl-o-surat to chuDelon ki hai pariyon ke mizaj

chhoD aae haram-e-pak mein jins-e-iman

lad kar la na sake jab ki watan tak hujjaj

aise bhi bani-e-be-dad hain kuchh duniya mein

falak-e-pir bhi deta hai jinhen jhuk ke KHiraj

husn ki jitni zamin hoti hai na-qabil-e-kasht

ishq paida kiya karta hai sada sab mein anaj

sab kuchh allah ne de rakkha hai mal-o-zar-o-sim

hain magar ahl-e-duwal aql-o-KHirad ke muhtaj

is ke aain nahin ab jo amal ke qabil

to ise kar do retire ki purana hai samaj

jab kabhi log taraqqi ki taraf baDhte hain

Tang uDa dete hain kambaKHt yahi rasm-o-riwaj

hae kya puchhte ho murda dilon ka ahwal

miyan zinda hain magar bewa hain un ki azwaj

na-KHudai kiya karta hai talatum KHud hi

kheti hain aap hi aa kar meri kashti amwaj

chain se shaiKH-e-haram umr basar karte hain

rupaya bank mein hai milta hai mahana byaj

kag uD uD ke ye botal ke sada dete hain

nashsha-bandi ki suna hai koi meeting hai aaj

ab tu jo chahe kare ishq-e-watan mein ai 'shauq'

husn kuchh bol nahin sakta hai de kar sauraj