tark-e-talluqat ka wada nahin kiya

tark-e-ta.alluqāt kā va.ada nahīñ kiyā

va.ada agar kiyā use puurā nahīñ kiyā

ik kaam thā zarūrī zarūrī thā ek kaam

dil mutma.in nahīñ thā lihāzā nahīñ kiyā

jaisī milī hai vaisī guzārī hai zindagī

ham ne kahīñ bhī jhūTā dikhāvā nahīñ kiyā

ḳhud ko ka.ī maqām pe ḳham to kiyā zarūr

lekin kisī ke rū-ba-rū sajda nahīñ kiyā

apnī bisāt se bhī baḌhā kar ke ḳhvāhishāt

apne dukhoñ meñ aur izāfa nahīñ kiyā

dhokā kisī ke saath jo karnā paḌā agar

vo bhī zarūratoñ se ziyāda nahīñ kiyā

ik baar bārgāh-e-ilāhī meñ kī duā

phir us se duujī baar taqāza nahīñ kiyā

jis se bhī hai faqat vo usūloñ kī jañg hai

varna kabhī kisī se bhī jhagḌā nahīñ kiyā

raḳht-e-safar meñ sab ko barābar kiyā sharīk

taqsīm-e-zād-e-rāh anokhā nahīñ kiyā

tark-e-talluqat ka wada nahin kiya

wada agar kiya use pura nahin kiya

ek kaam tha zaruri zaruri tha ek kaam

dil mutmain nahin tha lihaza nahin kiya

jaisi mili hai waisi guzari hai zindagi

hum ne kahin bhi jhuTa dikhawa nahin kiya

KHud ko kai maqam pe KHam to kiya zarur

lekin kisi ke ru-ba-ru sajda nahin kiya

apni bisat se bhi baDha kar ke KHwahishat

apne dukhon mein aur izafa nahin kiya

dhoka kisi ke sath jo karna paDa agar

wo bhi zaruraton se ziyaada nahin kiya

ek bar bargah-e-ilahi mein ki dua

phir us se duji bar taqaza nahin kiya

jis se bhi hai faqat wo usulon ki jang hai

warna kabhi kisi se bhi jhagDa nahin kiya

raKHt-e-safar mein sab ko barabar kiya sharik

taqsim-e-zad-e-rah anokha nahin kiya