tark-e-talluqat pe majbur ho gaya

tark-e-ta.alluqāt pe majbūr ho gayā

ḳhushbū se ik gulāb bahut duur ho gayā

harf-o-kitāb aaj bhī haiñ muntazir tire

ma.anī tire firāq meñ ranjūr ho gayā

garche tamām umr rahā ḳhvāb meñ mire

dekhā jo aañkh bhar ke to mastūr ho gayā

har faisle ke beach hai shāmil tirā ḳhayāl

tū merī kā.enāt kā manshūr ho gayā

aa.ī hai aañkh apne nazāre ke beach meñ

dariyā zarā sī buuñd meñ mahsūr ho gayā

kitnī ajiib chiiz hai manzil kī tishnagī

vo paas aa gayā ki bahut duur ho gayā

jis kī galī meñ jāntā koī na thā mujhe

ik din vo mere naam se mash.hūr ho gayā

tark-e-talluqat pe majbur ho gaya

KHushbu se ek gulab bahut dur ho gaya

harf-o-kitab aaj bhi hain muntazir tere

mani tere firaq mein ranjur ho gaya

garche tamam umr raha KHwab mein mere

dekha jo aankh bhar ke to mastur ho gaya

har faisle ke beach hai shamil tera KHayal

tu meri kaenat ka manshur ho gaya

aai hai aankh apne nazare ke beach mein

dariya zara si bund mein mahsur ho gaya

kitni ajib chiz hai manzil ki tishnagi

wo pas aa gaya ki bahut dur ho gaya

jis ki gali mein jaanta koi na tha mujhe

ek din wo mere nam se mashhur ho gaya