tark kar diya humne husn par ghazal likhna

tark kar diyā ham ne husn par ġhazal likhnā

vaqt kā taqāza hai mas.aloñ ke hal likhnā

hai badan to insāñ kā lazzatoñ kā ik daldal

lazzatoñ ke daldal meñ ruuh ko kañval likhnā

zindagī ke safhoñ par ḳhuun aur pasīne se

aaj bas amal likhnā phir hasīn kal likhnā

ūñche ūñche ohde haiñ haath kaT bhī sakte haiñ

be-zamīr logoñ par soch kar ġhazal likhnā

hādsoñ meñ bach jaanā mo.ajiza lage jab bhī

saañs kī rifāqat ko nekiyoñ kā phal likhnā

ḳhud-navisht jab apnī tum 'shakīl' likhoge

zindagī ke māthe kā ek ek bal likhnā

tark kar diya hum ne husn par ghazal likhna

waqt ka taqaza hai masalon ke hal likhna

hai badan to insan ka lazzaton ka ek daldal

lazzaton ke daldal mein ruh ko kanwal likhna

zindagi ke safhon par KHun aur pasine se

aaj bas amal likhna phir hasin kal likhna

unche unche ohde hain hath kaT bhi sakte hain

be-zamir logon par soch kar ghazal likhna

hadson mein bach jaana moajiza lage jab bhi

sans ki rifaqat ko nekiyon ka phal likhna

KHud-nawisht jab apni tum 'shakil' likhoge

zindagi ke mathe ka ek ek bal likhna