tark ki jaegi muddat ki rifaqat kaise

tark kī jā.egī muddat kī rifāqat kaise

chhoḌ degī mujhe tū ai shab-e-furqat kaise

un se pursish hai mire ḳhuuñ kī nadāmat mujhe hai

muñh par ab Daal luuñ dāmān-e-qayāmat kaise

roz ik taaza sitam roz na.ī ek jafā

kahte ho lab pe tire aa.ī shikāyat kaise

ḳhāna-e-dil se kabhī us ne nikāle nahīñ paañv

marte dam niklegī dekhūñ mirī hasrat kaise

josh par haiñ vo umangeñ haiñ javānī kī hai mauj

dekh kar un ko na lahrā.e tabī.at kaise

zikr-e-tārīkī-e-qabr aaya ki ye yaad aa.ī

bhūle dil se shab-e-furqat kī musībat kaise

chaal uḌā lī hai jo terī to falak par hai dimāġh

naaz ushshāq se kartī hai qayāmat kaise

apnī nādārī pe kyoñ daaġh lagā.e tū ne

te pe rakh chhoḌe haiñ do nuqte ye usrat kaise

zab.h ke vaqt bhī muñh mujh se vo phere hī rahe

dekh letā hai kisī kī koī sūrat kaise

shauq phir mujh ko madīne kā huā ai 'akbar'

dekhiye hotī hai rauze kī ziyārat kaise

tark ki jaegi muddat ki rifaqat kaise

chhoD degi mujhe tu ai shab-e-furqat kaise

un se pursish hai mere KHun ki nadamat mujhe hai

munh par ab Dal lun daman-e-qayamat kaise

roz ek taza sitam roz nai ek jafa

kahte ho lab pe tere aai shikayat kaise

KHana-e-dil se kabhi us ne nikale nahin panw

marte dam niklegi dekhun meri hasrat kaise

josh par hain wo umangen hain jawani ki hai mauj

dekh kar un ko na lahrae tabiat kaise

zikr-e-tariki-e-qabr aaya ki ye yaad aai

bhule dil se shab-e-furqat ki musibat kaise

chaal uDa li hai jo teri to falak par hai dimagh

naz ushshaq se karti hai qayamat kaise

apni nadari pe kyon dagh lagae tu ne

te pe rakh chhoDe hain do nuqte ye usrat kaise

zabh ke waqt bhi munh mujh se wo phere hi rahe

dekh leta hai kisi ki koi surat kaise

shauq phir mujh ko madine ka hua ai 'akbar'

dekhiye hoti hai rauze ki ziyarat kaise