tark-o-talab ke hangamon ko ishq samajhna wahshat hai

tark-o-talab ke hangāmoñ ko ishq samajhnā vahshat hai

ishq tahayyur be-pāyāñ hai ishq mujassam hairat hai

tum to yaqīnan jānte hoge vāqa.ī kyā ye haqīqat hai

aksar log kahā karte haiñ ishq baḌā bad-qismat hai

qāfile vaalo nā-vāqif ho shāyad in asrār se tum

rāh-e-talab meñ gāhe-gāhe gumrāhī bhī ne.amat hai

ham dīvāne kyā batlā.eñ ham se na pūchho kyoñ yaaro

har tahzīb kī mehrāboñ meñ ḳhūn-e-bashar kī rangat hai

fikr nahīñ hai us unsur kā naam mohabbat hai shāyad

jis se tahzībeñ bantī haiñ jis se ziist ibārat hai

raat ne sāz-e-mah-o-anjum par kitnī loriyāñ chheḌī haiñ

jī kartā hai ab so jaa.eñ ai ġham-e-hijr ijāzat hai

duniyā ko irfān-e-mohabbat dene vāloñ meñ 'hairat'

jaane kitne log haiñ jin ko apne aap se nafrat hai

tark-o-talab ke hangamon ko ishq samajhna wahshat hai

ishq tahayyur be-payan hai ishq mujassam hairat hai

tum to yaqinan jaante hoge waqai kya ye haqiqat hai

aksar log kaha karte hain ishq baDa bad-qismat hai

qafile walo na-waqif ho shayad in asrar se tum

rah-e-talab mein gahe-gahe gumrahi bhi neamat hai

hum diwane kya batlaen hum se na puchho kyon yaro

har tahzib ki mehrabon mein KHun-e-bashar ki rangat hai

fikr nahin hai us unsur ka nam mohabbat hai shayad

jis se tahziben banti hain jis se zist ibarat hai

raat ne saz-e-mah-o-anjum par kitni loriyan chheDi hain

ji karta hai ab so jaen ai gham-e-hijr ijazat hai

duniya ko irfan-e-mohabbat dene walon mein 'hairat'

jaane kitne log hain jin ko apne aap se nafrat hai