tarz-e-majhul sar-e-chashm numudar hue

tarz-e-maj.hūl sar-e-chashm numūdār hue

phuul hī phuul sar-e-chashm numūdār hue

harf jitne bhī ravāna the sū-e-arsh-e-barīñ

ho ke maqbūl sar-e-chashm numūdār hue

chashm-e-hairāñ ki shab-e-vasl ma.e tishna-dahan

chashm-e-mablūl sar-e-chashm numūdār hue

ek aajiz ko thamā.ī ga.ī shamshīr-e-anā

phir jo maqtūl sar-e-chashm numūdār hue

marsiya hai ki ka.ī phuul se dilkash chehre

oḌh kar dhuul sar-e-chashm numūdār hue

kīna-o-buġhz-o-anā hirs-o-adāvat ranjish

kitne mahsūl sar-e-chashm numūdār hue

dard-e-āshob ḳhalish shabnam-o-taskīñ 'ehrām'

ban ke mahlūl sar-e-chashm numūdār hue

tarz-e-majhul sar-e-chashm numudar hue

phul hi phul sar-e-chashm numudar hue

harf jitne bhi rawana the su-e-arsh-e-barin

ho ke maqbul sar-e-chashm numudar hue

chashm-e-hairan ki shab-e-wasl mae tishna-dahan

chashm-e-mablul sar-e-chashm numudar hue

ek aajiz ko thamai gai shamshir-e-ana

phir jo maqtul sar-e-chashm numudar hue

marsiya hai ki kai phul se dilkash chehre

oDh kar dhul sar-e-chashm numudar hue

kina-o-bughz-o-ana hirs-o-adawat ranjish

kitne mahsul sar-e-chashm numudar hue

dard-e-ashob KHalish shabnam-o-taskin 'ehram'

ban ke mahlul sar-e-chashm numudar hue