tasawwur kar-farma tha ki lazzat thi kahani ki

tasavvur kār-farmā thā ki lazzat thī kahānī kī

isī tasvīr ne āñkhoñ pe jaise hukmarānī kī

mirī parvāz kā manzar abhī tīroñ se chhalnī hai

lahū meñ tar-ba-tar hai dāstāñ naql-e-makānī kī

laboñ par barf jam jaa.e to istifsār kyā ma.anī

ki shor-o-ġhul faqat tamhīd hai shola-bayānī kī

qadam rakhte hī jaise khul gayā daldal meñ darvāza

ajab kārīgarī dekhī yahāñ miTTī meñ paanī kī

dikhā.ī raah sāhil kī unheñ pur-pech maujoñ ne

usī tūfān ne kashtī ke haq meñ bādbānī kī

bahut zarḳhez miTTī hai 'nizām' apne badan meñ bhī

havas ne phuul mahkā.e lahū ne bāġhbānī kī

tasawwur kar-farma tha ki lazzat thi kahani ki

isi taswir ne aankhon pe jaise hukmarani ki

meri parwaz ka manzar abhi tiron se chhalni hai

lahu mein tar-ba-tar hai dastan naql-e-makani ki

labon par barf jam jae to istifsar kya mani

ki shor-o-ghul faqat tamhid hai shola-bayani ki

qadam rakhte hi jaise khul gaya daldal mein darwaza

ajab karigari dekhi yahan miTTi mein pani ki

dikhai rah sahil ki unhen pur-pech maujon ne

usi tufan ne kashti ke haq mein baadbani ki

bahut zarKHez miTTi hai 'nizam' apne badan mein bhi

hawas ne phul mahkae lahu ne baghbani ki