tasawwur ko jaga rakkha hai usne

tasavvur ko jagā rakkhā hai us ne

darīcha niim vā rakkhā hai us ne

zarā sā phuul mere baaġh meñ hai

bahut kuchh māvarā rakkhā hai us ne

binā dekhe gavāhī māñgtā hai

savāl apnā judā rakkhā hai us ne

mire hone se ḳhud merā ta.alluq

ba-rañg-e-intihā rakkhā hai us ne

miTā detā hai har tasvīr merī

mujhe apnā banā rakkhā hai us ne

hamārī pyaas qatroñ meñ likhī hai

magar dariyā bahā rakkhā hai us ne

ye sūraj chāñd tāroñ kā zamāna

bas ik lamha jalā rakkhā hai us ne

banāvaT barmalā phūloñ kī sūrat

ki ḳhushbū ko chhupā rakkhā hai us ne

khaḌī hai raah roke ḳhud-farebī

mujhe vāpas bulā rakkhā hai us ne

havā kā hai na paanī kā karishma

nafas ko ḳhud jalā rakkhā hai us ne

mujhe be-nām kar detā hai 'ahmad'

ki naam apnā ḳhudā rakkhā hai us ne

tasawwur ko jaga rakkha hai us ne

daricha nim wa rakkha hai us ne

zara sa phul mere bagh mein hai

bahut kuchh mawara rakkha hai us ne

bina dekhe gawahi mangta hai

sawal apna juda rakkha hai us ne

mere hone se KHud mera talluq

ba-rang-e-intiha rakkha hai us ne

miTa deta hai har taswir meri

mujhe apna bana rakkha hai us ne

hamari pyas qatron mein likhi hai

magar dariya baha rakkha hai us ne

ye suraj chand taron ka zamana

bas ek lamha jala rakkha hai us ne

banawaT barmala phulon ki surat

ki KHushbu ko chhupa rakkha hai us ne

khaDi hai rah roke KHud-farebi

mujhe wapas bula rakkha hai us ne

hawa ka hai na pani ka karishma

nafas ko KHud jala rakkha hai us ne

mujhe be-nam kar deta hai 'ahmad'

ki nam apna KHuda rakkha hai us ne