tasawwur mein jamal-e-ru-e-taban le ke chalta hun

tasavvur meñ jamāl-e-rū-e-tābāñ le ke chaltā huuñ

añdherī raah meñ sham-e-farozāñ le ke chaltā huuñ

shikasta-dil hujūm-e-yās-o-hirmāñ le ke chaltā huuñ

huzūr-e-husn maiñ ye sāz-o-sāmāñ le ke chaltā huuñ

unheñ shāyad yaqīñ aa jaa.e ab merī mohabbat kā

maiñ un ke rū-ba-rū chāk-e-garebāñ le ke chaltā huuñ

tumhārī yaad har ik gaam par mujh ko rulātī hai

agar dil meñ kabhī jiine kā armāñ le ke chaltā huuñ

Tapaktā hai lahū ehsās ke rañgīñ darīchoñ se

maiñ apne dil meñ jab yād-e-shahīdāñ le ke chaltā huuñ

use shāyad mirī ma.asūmiyat par rahm aa jaa.e

ḳhudā ke sāmne maiñ fard-e-isyāñ le ke chaltā huuñ

mujhe bhī apne ehsās-e-vafā ko āzmānā hai

ba-zo.am-e-ishq afkār-e-pareshāñ le ke chaltā huuñ

mirī ḳhuddār 'fitrat' kī ḳhudā hī aabrū rakkhe

ḳhizāñ ke daur meñ azm-e-bahārāñ le ke chaltā huuñ

tasawwur mein jamal-e-ru-e-taban le ke chalta hun

andheri rah mein sham-e-farozan le ke chalta hun

shikasta-dil hujum-e-yas-o-hirman le ke chalta hun

huzur-e-husn main ye saz-o-saman le ke chalta hun

unhen shayad yaqin aa jae ab meri mohabbat ka

main un ke ru-ba-ru chaak-e-gareban le ke chalta hun

tumhaari yaad har ek gam par mujh ko rulati hai

agar dil mein kabhi jine ka arman le ke chalta hun

Tapakta hai lahu ehsas ke rangin darichon se

main apne dil mein jab yaad-e-shahidan le ke chalta hun

use shayad meri masumiyat par rahm aa jae

KHuda ke samne main fard-e-isyan le ke chalta hun

mujhe bhi apne ehsas-e-wafa ko aazmana hai

ba-zoam-e-ishq afkar-e-pareshan le ke chalta hun

meri KHuddar 'fitrat' ki KHuda hi aabru rakkhe

KHizan ke daur mein azm-e-bahaaran le ke chalta hun