tasawwur mein mere aise koi chehra nikalta hai

tasavvur meñ mire aise koī chehra nikaltā hai

ki sūkhī shāḳh par jaise harā patta nikaltā hai

farishte ghar kī chaukhaT par khaḌe rahte haiñ saf bāñdhe

ki jab schōl ko ghar se koī bachcha nikaltā hai

zamīñ bhī jaise merā imtihāñ lene ke dar pai hai

jidhar paañv baḌhātā huuñ udhar sahrā nikaltā hai

haqīqat un kī jo bhī ho aqīda hai yahī apnā

inhīñ ḳhvāboñ se manzil ke liye rasta nikaltā hai

safar sūraj kā mujh ko jab kabhī darpesh aa jaa.e

to merā ham-safar ban kar mirā saaya nikaltā hai

karegī manfa.at hāsil isī se fasl-e-mustaqbil

hamārī zaat se jo ye suḳhan dariyā nikaltā hai

mujhe merī nazar meñ mo'atabar kartā hai vo paiham

mirā dushman mire haq meñ sadā sachchā nikaltā hai

hamārī pyaas sachchī hai ham ismā.īl vaale haiñ

jahāñ eḌī ragaḌ deñ ham vahīñ dariyā nikaltā hai

zalīl-o-ḳhvār hote haiñ 'obaid'-e-bā-ḳhabar logo

mohabbat kā magar sar se kahāñ saudā nikaltā hai

tasawwur mein mere aise koi chehra nikalta hai

ki sukhi shaKH par jaise hara patta nikalta hai

farishte ghar ki chaukhaT par khaDe rahte hain saf bandhe

ki jab school ko ghar se koi bachcha nikalta hai

zamin bhi jaise mera imtihan lene ke dar pai hai

jidhar panw baDhata hun udhar sahra nikalta hai

haqiqat un ki jo bhi ho aqida hai yahi apna

inhin KHwabon se manzil ke liye rasta nikalta hai

safar suraj ka mujh ko jab kabhi darpesh aa jae

to mera ham-safar ban kar mera saya nikalta hai

karegi manfat hasil isi se fasl-e-mustaqbil

hamari zat se jo ye suKHan dariya nikalta hai

mujhe meri nazar mein mo'atabar karta hai wo paiham

mera dushman mere haq mein sada sachcha nikalta hai

hamari pyas sachchi hai hum ismail wale hain

jahan eDi ragaD den hum wahin dariya nikalta hai

zalil-o-KHwar hote hain 'obaid'-e-ba-KHabar logo

mohabbat ka magar sar se kahan sauda nikalta hai