tasawwur pyar ka jo hai purana karne wala hun

tasavvur pyaar kā jo hai purānā karne vaalā huuñ

maiñ apnī āp-bītī ko fasāna karne vaalā huuñ

jahāñ pe sirf vo thī aur maiñ thā aur ḳhushbū thī

usī jhurmaT ko apnā āshiyāna karne vaalā huuñ

jise maiñ chāhtā huuñ vo kahīñ kī shāhzādī hai

so us ke vāste ḳhud ko shahāna karne vaalā huuñ

udāsī dekh aa.ī hai makāñ shahr-e-mohabbat meñ

jahāñ maiñ shaam ko jā kar bayāna karne vaalā huuñ

mujhe ma.alūm hai vo kyā shikāyat karne vaalī hai

use ma.alūm hai maiñ kyā bahāna karne vaalā huuñ

tirī āñkhoñ tirī zulfoñ tire hoñThoñ se vābasta

ka.ī armān haiñ jin ko siyānā karne vaalā huuñ

use jo aql-mandī kī baḌī bāteñ batāte haiñ

unhīñ logoñ ko ab apnā divāna karne vaalā huuñ

'charāġh' ab kaun sī majbūriyāñ haiñ jo añdherā hai

tumhīñ kahte the ki raushan zamāna karne vaalā huuñ

tasawwur pyar ka jo hai purana karne wala hun

main apni aap-biti ko fasana karne wala hun

jahan pe sirf wo thi aur main tha aur KHushbu thi

usi jhurmaT ko apna aashiyana karne wala hun

jise main chahta hun wo kahin ki shahzadi hai

so us ke waste KHud ko shahana karne wala hun

udasi dekh aai hai makan shahr-e-mohabbat mein

jahan main sham ko ja kar bayana karne wala hun

mujhe malum hai wo kya shikayat karne wali hai

use malum hai main kya bahana karne wala hun

teri aankhon teri zulfon tere honThon se wabasta

kai arman hain jin ko siyana karne wala hun

use jo aql-mandi ki baDi baaten batate hain

unhin logon ko ab apna diwana karne wala hun

'charagh' ab kaun si majburiyan hain jo andhera hai

tumhin kahte the ki raushan zamana karne wala hun