tasawwuraat ke KHakon mein tera ang bhare

tasavvurāt ke ḳhākoñ meñ terā añg bhare

kabhī musavvir-e-hastī kuchh aisā rañg bhare

chamak uThe mire ḳhvāb-o-ḳhayāl kī duniyā

yuuñ merī zaat meñ jalvoñ ke jal-tarañg bhare

ḳhayāl-e-sūd-o-ziyāñ phir na ho mohabbat meñ

tirī nigāh kabhī dil meñ vo umañg bhare

Thahar na jaa.e kahīñ aaj phir se nabz-e-hayāt

pilā vo jaam ki jo ḳhvāhishoñ meñ jañg bhare

surūr de vo ki ho vajd meñ junūñ raqsāñ

to saaz chheḌ kabhī aise bhī tarañg bhare

palaT ke vaar bhī karte kamīn-gāh pe kyā

hameñ to tiir hī baḳhshe ga.e haiñ zañg bhare

ba-tarz-e-nau liyā jaa.e phir imtihān-e-dil

gulāb shāḳh pe khilne lageñ jo sañg bhare

hayāt-e-nau hī kare jumbisheñ atā un ko

nazar se jaam pilā.e ga.e jo bhañg bhare

bhaTak na jaa.eñ agar ham to kyā kareñ 'ḳhāvar'

jamāl-e-yār ke raste haiñ jab surañg bhare

tasawwuraat ke KHakon mein tera ang bhare

kabhi musawwir-e-hasti kuchh aisa rang bhare

chamak uThe mere KHwab-o-KHayal ki duniya

yun meri zat mein jalwon ke jal-tarang bhare

KHayal-e-sud-o-ziyan phir na ho mohabbat mein

teri nigah kabhi dil mein wo umang bhare

Thahar na jae kahin aaj phir se nabz-e-hayat

pila wo jam ki jo KHwahishon mein jang bhare

surur de wo ki ho wajd mein junun raqsan

to saz chheD kabhi aise bhi tarang bhare

palaT ke war bhi karte kamin-gah pe kya

hamein to tir hi baKHshe gae hain zang bhare

ba-tarz-e-nau liya jae phir imtihan-e-dil

gulab shaKH pe khilne lagen jo sang bhare

hayat-e-nau hi kare jumbishen ata un ko

nazar se jam pilae gae jo bhang bhare

bhaTak na jaen agar hum to kya karen 'KHawar'

jamal-e-yar ke raste hain jab surang bhare