tasawwuraat ki duniya basa raha hun main

tasavvurāt kī duniyā basā rahā huuñ maiñ

tire ḳhayāl se taskīn pā rahā huuñ maiñ

ḳhayāl-o-vahm se ūñchī bahut hai terī zaat

tirī sifāt kā naqsha jamā rahā huuñ maiñ

mirā vajūd bhī partav hai terī hastī kā

dil-e-hazīñ meñ tirā nuur pā rahā huuñ maiñ

ye kaun hai ki ma.ayyat kā lutf hāsil hai

tamām ālam-e-imkāñ pe chhā rahā huuñ maiñ

tire karam kī nihāyat nahīñ mire mālik

ki musht-e-ḳhāk ko kundan banā rahā huuñ maiñ

jilau meñ jis kī ho amn-o-sukūñ kī gul-pāshī

vo inqalāb zamāne meñ lā rahā huuñ maiñ

tire kalām-e-muqaddas se raushnī le kar

añdherī raat meñ sham.eñ jalā rahā huuñ maiñ

mirī bisāt hī kyā hai jahāñ ke rakhvāle

tire sahāre pe himmat dikhā rahā huuñ maiñ

tasawwuraat ki duniya basa raha hun main

tere KHayal se taskin pa raha hun main

KHayal-o-wahm se unchi bahut hai teri zat

teri sifat ka naqsha jama raha hun main

mera wajud bhi partaw hai teri hasti ka

dil-e-hazin mein tera nur pa raha hun main

ye kaun hai ki mayyat ka lutf hasil hai

tamam aalam-e-imkan pe chha raha hun main

tere karam ki nihayat nahin mere malik

ki musht-e-KHak ko kundan bana raha hun main

jilau mein jis ki ho amn-o-sukun ki gul-pashi

wo inqalab zamane mein la raha hun main

tere kalam-e-muqaddas se raushni le kar

andheri raat mein shamen jala raha hun main

meri bisat hi kya hai jahan ke rakhwale

tere sahaare pe himmat dikha raha hun main