tasawwuraat ki duniya basae baiTha hun

tasavvurāt kī duniyā basā.e baiThā huuñ

ḳhazīna-hā-e-mohabbat luTā.e baiThā huuñ

tasavvurāt kī duniyā meñ mahv huuñ itnā

ki apne aap ko dil se bhulā.e baiThā huuñ

kisī hasīn kā chehra hai sāmne mere

usī ko qibla-o-ka.aba banā.e baiThā huuñ

maiñ mai-kade kī bahāroñ ko dekh kar saaqī

kisī ke nashshe pe nazreñ jamā.e baiThā huuñ

tumhāre va.ada-e-fardā pe e.atibār nahīñ

magar umiid kī sham.eñ jalā.e baiThā huuñ

bhaTak gayā huuñ magar rāsta na pūchhūñgā

ajiib zid hai ki dil meñ biThā.e baiThā huuñ

safīna Duub rahā hai magar ḳhudā se nahīñ

maiñ nāḳhudā se umīdeñ lagā.e baiThā huuñ

pahuñch hī jā.ūñgā manzil pe ek din 'sādiq'

agarche naqsh-e-kaf-e-pā miTā.e baiThā huuñ

tasawwuraat ki duniya basae baiTha hun

KHazina-ha-e-mohabbat luTae baiTha hun

tasawwuraat ki duniya mein mahw hun itna

ki apne aap ko dil se bhulae baiTha hun

kisi hasin ka chehra hai samne mere

usi ko qibla-o-kaba banae baiTha hun

main mai-kade ki bahaaron ko dekh kar saqi

kisi ke nashshe pe nazren jamae baiTha hun

tumhaare wada-e-farda pe eatibar nahin

magar umid ki shamen jalae baiTha hun

bhaTak gaya hun magar rasta na puchhunga

ajib zid hai ki dil mein biThae baiTha hun

safina Dub raha hai magar KHuda se nahin

main naKHuda se umiden lagae baiTha hun

pahunch hi jaunga manzil pe ek din 'sadiq'

agarche naqsh-e-kaf-e-pa miTae baiTha hun