tasawwuraat ki duniya sajae baiThe hain

tasavvurāt kī duniyā sajā.e baiThe haiñ

kisī kī aas ko dil se lagā.e baiThe haiñ

fareb umr do roza kā khaa.e baiThe haiñ

batā.eñ kyā ki jo sadma uThā.e baiThe haiñ

na jaane kis ghaḌī aa jaa.eñ DhūñDte ham ko

charāġh din meñ bhī dar par jalā.e baiThe haiñ

sunā hai jab se duā.eñ qubūl hotī haiñ

duā ko haath ham apne uThā.e baiThe haiñ

vo aa rahe haiñ koī kah rahā hai kānoñ meñ

charāġh diid kā ham to bujhā.e baiThe haiñ

ġharīb-ḳhāne kī saarī fazā mo.attar hai

ye lag rahā hai vo aa.e haiñ aa.e baiThe haiñ

na pūchh kaise shab-e-intizār guzrī hai

na chheḌ ham ko sabā ham satā.e baiThe haiñ

ḳhabar kahāñ hai zamāne kī 'soz' ham us ko

kisī ke ishq meñ ḳhud ko bhulā.e baiThe haiñ

tasawwuraat ki duniya sajae baiThe hain

kisi ki aas ko dil se lagae baiThe hain

fareb umr do roza ka khae baiThe hain

bataen kya ki jo sadma uThae baiThe hain

na jaane kis ghaDi aa jaen DhunDte hum ko

charagh din mein bhi dar par jalae baiThe hain

suna hai jab se duaen qubul hoti hain

dua ko hath hum apne uThae baiThe hain

wo aa rahe hain koi kah raha hai kanon mein

charagh did ka hum to bujhae baiThe hain

gharib-KHane ki sari faza moattar hai

ye lag raha hai wo aae hain aae baiThe hain

na puchh kaise shab-e-intizar guzri hai

na chheD hum ko saba hum satae baiThe hain

KHabar kahan hai zamane ki 'soz' hum us ko

kisi ke ishq mein KHud ko bhulae baiThe hain