tasawwuraat mein chehra tera banata hun

tasavvurāt meñ chehra tirā banātā huuñ

isī bahāne tire paas baiTh jaatā huuñ

yuuñ to zamāna bhī vāqif hai mere tevar se

par ik nigāh hai jis se maiñ ḳhauf khātā huuñ

tamām 'umr isī intizār meñ guzrī

vo bol kar gayā thā tum ruko maiñ aatā huuñ

na jaane kaisā 'ajab rog paal rakkhā hai

ḳhushī meñ rotā huuñ aur ġham meñ muskurātā huuñ

phir ek din mirā duniyā se kyā yaqīn uThā

maiñ tab se har kisī kā fā.eda uThātā huuñ

ġhazal kā zā.iqa baḌhnā to lāzmī hai 'harsh'

har ek she'r meñ apnā lahū jalātā huuñ

tasawwuraat mein chehra tera banata hun

isi bahane tere pas baiTh jata hun

yun to zamana bhi waqif hai mere tewar se

par ek nigah hai jis se main KHauf khata hun

tamam 'umr isi intizar mein guzri

wo bol kar gaya tha tum ruko main aata hun

na jaane kaisa 'ajab rog pal rakkha hai

KHushi mein rota hun aur gham mein muskuraata hun

phir ek din mera duniya se kya yaqin uTha

main tab se har kisi ka faeda uThata hun

ghazal ka zaiqa baDhna to lazmi hai 'harsh'

har ek she'r mein apna lahu jalata hun