تشکیک کے دھارے نئے نئے اوہام کی ندیاں نئی نئی

تشکیک کے دھارے نئے نئے اوہام کی ندیاں نئی نئی

ڈوبیں گے جزیرے ماضی کے ابھریں گی صدیاں نئی نئی

کچھ رنج نہیں آکاش پہ گر اب ظلم کی بدلی چھائی ہے

چھائیں گے مسرت کے بادل آئیں گی خوشیاں نئی نئی

یہ بھی سچ ہے کہ صحن چمن میں آج رواں ہے باد سموم

پھوٹیں گے شگوفے نئے نئے مہکیں گی کلیاں نئی نئی

تسلیم ہماری راہوں میں باطل نے رکاوٹ ڈالی ہے

نکلیں گے رستے نئے نئے نکلیں گی گلیاں نئی نئی

اس دور ترقی میں ہے ظفرؔ بادہ بھی نیا ساغر بھی نئے

ہیں قیس نئے گلفام نئے ہیں نیلم پریاں نئی نئی