تسکیں نہ مجھ کو رحم نہ لفظ دعا سے تھی

تسکیں نہ مجھ کو رحم نہ لفظ دعا سے تھی

جو مجھ گناہگار کو کار سزا سے تھی

اس سے بچھڑ رہا ہوں تو کیوں رو رہا ہوں میں

اس بات کی خبر تو مجھے ابتدا سے تھی

اب کے بچا سکی نہ مری خامشی مجھے

اس بار میری جنگ مرے ہم نوا سے تھی

پھر ہم نے بار غم کو مقدر سمجھ لیا

کچھ روز تک ہمیں بھی شکایت خدا سے تھی

چرچا بہت ہے جس کے تغافل کا شہر میں

اپنی بھی تو مراد اسی بے وفا سے تھی

ہجر و وصال دونوں ہی شرطوں میں طے تھی موت

ہم تھے چراغ ہم کو محبت ہوا سے تھی