taskin na mujhko rahm na lafz-e-du’a se thi

taskīñ na mujh ko rahm na lafz-e-du’ā se thī

jo mujh gunāh-gār ko kār-e-sazā se thī

us se bichhaḌ rahā huuñ to kyuuñ ro rahā huuñ maiñ

is baat kī ḳhabar to mujhe ibtidā se thī

ab ke bachā sakī na mirī ḳhāmushī mujhe

is baar merī jang mire ham-navā se thī

phir ham ne bār-e-ġham ko muqaddar samajh liyā

kuchh roz tak hameñ bhī shikāyat ḳhudā se thī

charchā bahut hai jis ke taġhāful kā shahr meñ

apnī bhī to murād usī bevafā se thī

hijr-o-visāl donoñ hī shartoñ meñ tai thī maut

ham the charāġh ham ko mohabbat havā se thī

taskin na mujh ko rahm na lafz-e-du’a se thi

jo mujh gunah-gar ko kar-e-saza se thi

us se bichhaD raha hun to kyun ro raha hun main

is baat ki KHabar to mujhe ibtida se thi

ab ke bacha saki na meri KHamushi mujhe

is bar meri jang mere ham-nawa se thi

phir hum ne bar-e-gham ko muqaddar samajh liya

kuchh roz tak hamein bhi shikayat KHuda se thi

charcha bahut hai jis ke taghaful ka shahr mein

apni bhi to murad usi bewafa se thi

hijr-o-visal donon hi sharton mein tai thi maut

hum the charagh hum ko mohabbat hawa se thi