taskin-o-rahm se na to lafz-e-dua se thi

taskīn-o-rahm se na to lafz-e-duā se thī

jo ham gunāhgāroñ ko kār-e-sazā se thī

us se bichhaḌ rahā huuñ to kyoñ ro rahā huuñ maiñ

is baat kī ḳhabar to mujhe ibtidā se thī

ab ke bachā sakī na mirī ḳhāmushī mujhe

is baar merī jañg kisī ham-navā se thī

dushman hī ek ahl-e-vafā chāhte the ham

hālāñki dostī to har ik bevafā se thī

ham ne bhī bār-e-ġham ko muqaddar samajh liyā

kuchh roz tak hameñ bhī shikāyat ḳhudā se thī

jis ke taġhāfuloñ ke the charche tamām shahr

apnī bhī to murād usī bevafā se thī

hijr-o-visāl donoñ hī shartoñ meñ tai thī maut

ham the charāġh ham ko mohabbat havā se thī

taskin-o-rahm se na to lafz-e-dua se thi

jo hum gunahgaron ko kar-e-saza se thi

us se bichhaD raha hun to kyon ro raha hun main

is baat ki KHabar to mujhe ibtida se thi

ab ke bacha saki na meri KHamushi mujhe

is bar meri jang kisi ham-nawa se thi

dushman hi ek ahl-e-wafa chahte the hum

haalanki dosti to har ek bewafa se thi

hum ne bhi bar-e-gham ko muqaddar samajh liya

kuchh roz tak hamein bhi shikayat KHuda se thi

jis ke taghafulon ke the charche tamam shahr

apni bhi to murad usi bewafa se thi

hijr-o-visal donon hi sharton mein tai thi maut

hum the charagh hum ko mohabbat hawa se thi