taswir-e-dost fikr-e-mujassam bani rahi

tasvīr-e-dost fikr-e-mujassam banī rahī

maiñ us se boltā rahā vo sochtī rahī

kal shab tasavvurāt kī mahfil sajī rahī

jab tak tumhārā zikr rahā chāñdnī rahī

shāyad samajh rahī thī use bhī koī charāġh

jugnū ke pīchhe tez havā dauḌtī rahī

paanī kā intizām thā ġhairoñ ke haath meñ

yuuñ bhī gharoñ meñ aag hamāre lagī rahī

puurī huī na sar ko kaTāne kī aarzū

kāñdhoñ pe mere dil kī tamannā rukī rahī

phir aglī jañg laḌnā magar is shikast meñ

ye sochnā paḌegā kahāñ kyā kamī rahī

thī un ko sirf ek nazar dekhne kī baat

jo harf-e-āḳhirī kī tarah āḳhirī rahī

ulfat meñ haar jiit kā lagtā nahīñ pata

vo shart jo lagī bhī nahīñ thī lagī rahī

'saulat' kamī tumhārī agar hai to maan lo

kab tak yahī kahoge ki qismat burī rahī

taswir-e-dost fikr-e-mujassam bani rahi

main us se bolta raha wo sochti rahi

kal shab tasawwuraat ki mahfil saji rahi

jab tak tumhaara zikr raha chandni rahi

shayad samajh rahi thi use bhi koi charagh

jugnu ke pichhe tez hawa dauDti rahi

pani ka intizam tha ghairon ke hath mein

yun bhi gharon mein aag hamare lagi rahi

puri hui na sar ko kaTane ki aarzu

kandhon pe mere dil ki tamanna ruki rahi

phir agli jang laDna magar is shikast mein

ye sochna paDega kahan kya kami rahi

thi un ko sirf ek nazar dekhne ki baat

jo harf-e-aKHiri ki tarah aaKHiri rahi

ulfat mein haar jit ka lagta nahin pata

wo shart jo lagi bhi nahin thi lagi rahi

'saulat' kami tumhaari agar hai to man lo

kab tak yahi kahoge ki qismat buri rahi