تصویر تری اے جان جہاں سینے سے لگائے پھرتا ہوں

تصویر تری اے جان جہاں سینے سے لگائے پھرتا ہوں

ہے عکس فروزاں خواب سا کچھ پلکوں پہ سجائے پھرتا ہوں

آتی ہے حلالی لقموں سے جن جن پہ غضب کی تابانی

ان روشن روشن چہروں کے میں سائے سائے پھرتا ہوں

تسبیح کے دانے کی صورت میں ورد کے روشن موتی سا

تدبیر کے زریں ہاتھوں میں تقدیر پھرائے پھرتا ہوں

وسواس مری طینت ہی نہیں اور یاس مری فطرت ہی نہیں

امید کی ہلکی جیوتی کو آنکھوں میں جلائے پھرتا ہوں

ہے منزل حق فردوس ظفرؔ باطل کا ٹھکانہ نار سقر

میں در در گھر گھر دعوت کا پرچم یہ اٹھائے پھرتا ہوں