tauba kije ab fareb-e-dosti khaenge kya

tauba kiije ab fareb-e-dostī khā.eñge kyā

aaj tak pachhtā rahe haiñ aur pachhtā.eñge kyā

ḳhud samajhiye zab.h hone vaale samjhā.eñge kyā

baat pahuñchegī kahāñ tak aap kahlā.eñge kyā

bazm-e-kasrat meñ ye kyuuñ hotā hai un kā intizār

parda-e-vahdat se vo bāhar nikal ā.eñge kyā

kal bahār aa.egī ye sun kar qafas badlo na tum

raat bhar meñ qaidiyoñ ke par nikal ā.eñge kyā

ai dil-e-muztar inhīñ bātoñ se chhūTā thā chaman

ab tire naale qafas se bhī nikalvā.eñge kyā

ai qafas vaalo rihā.ī kī tamannā hai fuzūl

fasl-e-gul aane se pahle par na kaT jā.eñge kyā

shām-e-ġham jal jal ke misl-e-sham.a ho jā.ūñgā ḳhatm

sub.h ko ahbāb ā.eñge to dafnā.eñge kyā

jāntā huuñ phūñk degā mere ghar ko bāġhbāñ

āshiyāñ ke paas vaale phuul rah jā.eñge kyā

un kī mahfil meñ chalā aayā hai dushman ḳhair ho

misl-e-ādam ham bhī jannat se nikal jā.eñge kyā

nāḳhudā maujoñ meñ kashtī hai to ho ham ko na dekh

jin ko tūfānoñ ne paalā hai vo ghabrā.eñge kyā

tū ne tūfāñ dekhte hī kyuuñ nigāheñ pher liiñ

nāḳhudā ye ahl-e-kashtī Duub hī jā.eñge kyā

kyuuñ ye bairūn-e-chaman jalte hue tinke ga.e

mere ghar kī aag duniyā bhar meñ phailā.eñge kyā

koī to mūnis rahegā ai 'qamar' shām-e-firāq

sham.a gul hogī to ye taare bhī chhup jā.eñge kyā

tauba kije ab fareb-e-dosti khaenge kya

aaj tak pachhta rahe hain aur pachhtaenge kya

KHud samajhiye zabh hone wale samjhaenge kya

baat pahunchegi kahan tak aap kahlaenge kya

bazm-e-kasrat mein ye kyun hota hai un ka intizar

parda-e-wahdat se wo bahar nikal aaenge kya

kal bahaar aaegi ye sun kar qafas badlo na tum

raat bhar mein qaidiyon ke par nikal aaenge kya

ai dil-e-muztar inhin baaton se chhuTa tha chaman

ab tere nale qafas se bhi nikalwaenge kya

ai qafas walo rihai ki tamanna hai fuzul

fasl-e-gul aane se pahle par na kaT jaenge kya

sham-e-gham jal jal ke misl-e-shama ho jaunga KHatm

subh ko ahbab aaenge to dafnaenge kya

jaanta hun phunk dega mere ghar ko baghban

aashiyan ke pas wale phul rah jaenge kya

un ki mahfil mein chala aaya hai dushman KHair ho

misl-e-adam hum bhi jannat se nikal jaenge kya

naKHuda maujon mein kashti hai to ho hum ko na dekh

jin ko tufanon ne pala hai wo ghabraenge kya

tu ne tufan dekhte hi kyun nigahen pher lin

naKHuda ye ahl-e-kashti Dub hi jaenge kya

kyun ye bairun-e-chaman jalte hue tinke gae

mere ghar ki aag duniya bhar mein phailaenge kya

koi to munis rahega ai 'qamar' sham-e-firaq

shama gul hogi to ye tare bhi chhup jaenge kya