توبہ شکن خمار تھا امڈے شباب کا

توبہ شکن خمار تھا امڈے شباب کا

پھولوں میں جیسے پھول شگفتہ گلاب کا

فن کار کو سلام شہنشاہ کیوں کرے

ذروں سے واسطہ ہے کہاں آفتاب کا

گدڑی میں پھر لپیٹ کے لایا ہے کوئی لعل

کیوں بے حجاب ہو گیا سودا حجاب کا

ہر سو فسادیوں کے حوالے تھیں بستیاں

محشر بپا تھا چار سو قہر و عذاب کا

قانون پر زوال کہ غصے میں ہے عوام

شعلہ بھڑک نہ جائے کہیں انقلاب کا

کیوں ہو رہے ہیں آگ بگولا جناب من

ہم نے تو محض حال ہی پوچھا جناب کا

نیرؔ کی ہر دلیل ہے نا قابل قبول

چھیڑے نہ ذکر کوئی گناہ و ثواب کا