taufiq agar rahbar-e-manzil nahin hoti

taufīq agar rahbar-e-manzil nahīñ hotī

me.arāj-e-mohabbat kabhī hāsil nahīñ hotī

jo soz-e-mohabbat se na ho sho.ala-ba-dāmāñ

vo sham.a kabhī raunaq-e-mahfil nahīñ hotī

jo aañkh na ho husn-e-haqīqat kī shanāsā

vo dīd-e-ruḳh-e-yār ke qābil nahīñ hotī

jab tak na bhare rañg vafā mānī-e-fitrat

tasvīr-e-mohabbat kabhī kāmil nahīñ hotī

dilkash haiñ kuchh aise rah-e-ulfat ke manāzir

rahrav ko kabhī ḳhvāhish-e-manzil nahīñ hotī

gir paḌtā huuñ aksar maiñ rah-e-ishq meñ jis jā

ik marhala hotā hai vo manzil nahīñ hotī

nā-kām mohabbat huuñ maiñ ai 'rāz' to kyā ġham

ye baat bhī har ek ko hāsil nahīñ hotī

taufiq agar rahbar-e-manzil nahin hoti

mearaj-e-mohabbat kabhi hasil nahin hoti

jo soz-e-mohabbat se na ho shoala-ba-daman

wo shama kabhi raunaq-e-mahfil nahin hoti

jo aankh na ho husn-e-haqiqat ki shanasa

wo did-e-ruKH-e-yar ke qabil nahin hoti

jab tak na bhare rang wafa mani-e-fitrat

taswir-e-mohabbat kabhi kaamil nahin hoti

dilkash hain kuchh aise rah-e-ulfat ke manazir

rahraw ko kabhi KHwahish-e-manzil nahin hoti

gir paDta hun aksar main rah-e-ishq mein jis ja

ek marhala hota hai wo manzil nahin hoti

na-kaam mohabbat hun main ai 'raaz' to kya gham

ye baat bhi har ek ko hasil nahin hoti