taur apna hai alag in se alag aan se alag

taur apnā hai alag iiñ se alag aañ se alag

go kisī taur nahīñ hikmat-e-yazdāñ se alag

ziist ik aur bhī hai qaid-e-rag-e-jāñ se alag

sub.h-e-tābāñ se judā shām-e-ġharībāñ se alag

zulmat-e-shab kī tarah nūr-e-shabistāñ se alag

ġham-e-daurāñ se alag ishq-e-nigārāñ se alag

gar tire vāste dil dhaḌke to zinda tū hai

dil kī āvāz hai āvāz-e-pareshāñ se alag

jab kabhī fikr mirā ramz-e-anā se uljhā

aalam ik aur banā ālam-e-imkāñ se alag

umr yuuñ ham ne guzārī hai zamāne meñ 'jamīl'

na ram-e-zīst meñ shāmil na ġham-e-jāñ se alag

taur apna hai alag in se alag aan se alag

go kisi taur nahin hikmat-e-yazdan se alag

zist ek aur bhi hai qaid-e-rag-e-jaan se alag

subh-e-taban se juda sham-e-ghariban se alag

zulmat-e-shab ki tarah nur-e-shabistan se alag

gham-e-dauran se alag ishq-e-nigaran se alag

gar tere waste dil dhaDke to zinda tu hai

dil ki aawaz hai aawaz-e-pareshan se alag

jab kabhi fikr mera ramz-e-ana se uljha

aalam ek aur bana aalam-e-imkan se alag

umr yun hum ne guzari hai zamane mein 'jamil'

na ram-e-zist mein shamil na gham-e-jaan se alag