tawaf-e-kaba-o-but-KHana la-hasil samajhte hain

tavāf-e-ka.aba-o-but-ḳhāna lā-hāsil samajhte haiñ

jo apne dil ko husn-e-yār kī manzil samajhte haiñ

vo hī kuchh dard ko dard aur dil ko dil samajhte haiñ

kisī nākām kī mushkil ko jo mushkil samajhte haiñ

harīm-e-nāz kā hotā hai dhokā zarre zarre par

tire dīvāne har uftād ko manzil samajhte haiñ

hazāroñ jāñ-sitāñ fitne liyā karte haiñ añgḌā.ī

tirī mastī bharī āñkhoñ ko ham qātil samajhte haiñ

junūñ meñ paikar-e-har-zarra hai sāz-e-anā-lailā

koī parda ho vahshī parda-e-mahmil samajhte haiñ

mohabbat meñ jinheñ har gaam par hotī hai nākāmī

vahī kuchh qadr-e-zauq-e-sa.ī-e-lā-hāsil samajhte haiñ

na pūchho kuchh ki hai sarf-e-ḳhalish kyā chiiz pahlū meñ

sab is ko dard kahte haiñ ham is ko dil samajhte haiñ

mohabbat be-niyāz-e-kaif-e-vasl-o-hijr hotī hai

ise kyā bul-havas samjhegā ahl-e-dil samajhte haiñ

nazar pahūñchī kahāñ allāhu-akbar tere kushtoñ kī

ki apne hī ko apnā hashr meñ qātil samajhte haiñ

musībat māya-e-rāhat hai arbāb-e-mohabbat ko

haqīqat-āshnā girdāb ko sāhil samajhte haiñ

taḌap kar jaan de denā jo sach pūchho to āsāñ hai

mohabbat meñ magar jiine ko ham mushkil samajhte haiñ

usī par bārisheñ hotī haiñ anvār-e-tajallī kī

jise vo iltifāt-e-nāz ke qābil samajhte haiñ

haqīqat meñ unhīñ kī zindagī hai zindagī 'farruḳh'

ajal ko hastī-e-fānī kā jo hāsil samajhte haiñ

tawaf-e-kaba-o-but-KHana la-hasil samajhte hain

jo apne dil ko husn-e-yar ki manzil samajhte hain

wo hi kuchh dard ko dard aur dil ko dil samajhte hain

kisi nakaam ki mushkil ko jo mushkil samajhte hain

harim-e-naz ka hota hai dhoka zarre zarre par

tere diwane har uftad ko manzil samajhte hain

hazaron jaan-sitan fitne liya karte hain angDai

teri masti bhari aankhon ko hum qatil samajhte hain

junun mein paikar-e-har-zarra hai saz-e-ana-laila

koi parda ho wahshi parda-e-mahmil samajhte hain

mohabbat mein jinhen har gam par hoti hai nakaami

wahi kuchh qadr-e-zauq-e-sai-e-la-hasil samajhte hain

na puchho kuchh ki hai sarf-e-KHalish kya chiz pahlu mein

sab is ko dard kahte hain hum is ko dil samajhte hain

mohabbat be-niyaz-e-kaif-e-wasl-o-hijr hoti hai

ise kya bul-hawas samjhega ahl-e-dil samajhte hain

nazar pahunchi kahan allahu-akbar tere kushton ki

ki apne hi ko apna hashr mein qatil samajhte hain

musibat maya-e-rahat hai arbab-e-mohabbat ko

haqiqat-ashna girdab ko sahil samajhte hain

taDap kar jaan de dena jo sach puchho to aasan hai

mohabbat mein magar jine ko hum mushkil samajhte hain

usi par barishen hoti hain anwar-e-tajalli ki

jise wo iltifat-e-naz ke qabil samajhte hain

haqiqat mein unhin ki zindagi hai zindagi 'farruKH'

ajal ko hasti-e-fani ka jo hasil samajhte hain