tawana hun dil-e-ranjur ki saugand kyon khaun

tavānā huuñ dil-e-ranjūr kī saugand kyoñ khā.ūñ

maiñ jab muḳhtār huuñ majbūr kī saugand kyoñ khā.ūñ

mujhe arsh-e-barīñ ke jalva-e-dā.im se nisbat hai

koī vaa.iz huuñ maiñ bhī huur kī saugand kyoñ khā.ūñ

mirā tūr-e-tajallī raat din hai mere pahlū meñ

nahīñ jab aag lenā tuur kī saugand kyoñ khā.ūñ

mirā har nā-chakīda ashk kā qatra hai be-sāhil

maiñ tūfān-e-balā tannūr kī saugand kyoñ khā.ūñ

haqīqat meñ mirī ḳhāmoshiyāñ parda haiñ mahshar kā

huuñ ḳhurshīd-e-qayāmat suur kī saugand kyoñ khā.ūñ

anal-haq kī bajā.e maiñ alal-haq kā huuñ āvāza

paḌī hai kyā mujhe mansūr kī saugand kyoñ khā.ūñ

kulāh-e-faqr jab maiñ ne azal se oḌh rakkhī hai

'amīñ' tū hī batā faġhfūr kī saugand kyoñ khā.ūñ

tawana hun dil-e-ranjur ki saugand kyon khaun

main jab muKHtar hun majbur ki saugand kyon khaun

mujhe arsh-e-barin ke jalwa-e-daim se nisbat hai

koi waiz hun main bhi hur ki saugand kyon khaun

mera tur-e-tajalli raat din hai mere pahlu mein

nahin jab aag lena tur ki saugand kyon khaun

mera har na-chakida ashk ka qatra hai be-sahil

main tufan-e-bala tannur ki saugand kyon khaun

haqiqat mein meri KHamoshiyan parda hain mahshar ka

hun KHurshid-e-qayamat sur ki saugand kyon khaun

anal-haq ki bajae main alal-haq ka hun aawaza

paDi hai kya mujhe mansur ki saugand kyon khaun

kulah-e-faqr jab main ne azal se oDh rakkhi hai

'amin' tu hi bata faghfur ki saugand kyon khaun