tawil raaton ke ghup andheron ke baad nikla hai kya naya din

tavīl rātoñ ke ghup añdheroñ ke baa'd niklā hai kyā nayā din

ḳhizāñ kī zardī se zard hotā bujhā-bujhā sogvār sā din

junūñ ke sahrā meñ jhulsā-jhulsā sulag-sulag kar guzar rahā thā

phir abr-ālūd ishq sūraj ko Dhak ke thoḌā bachā gayā din

na jaane kitnī bujhī ummīdeñ thiiñ dil bhī shab se bujhā huā thā

kiran jo phūTī to jaagī āñkhoñ meñ surḳh Doroñ sā bhar gayā din

ḳhushī ke jaisī ḳhushī nahīñ thī magar the ġham sab ġhamoñ ke jaise

thā ek muflis ke TuuTe chhappar meñ raat jaisā jalā bujhā din

ye raat aatī hī is liye hai ki din kī qīmat samajh meñ aa.e

magar haiñ kuchh bad-nasīb aise ki jin ko sab kuchh milā sivā din

mahakne vaalī hai raat jaise uruus mushk-o-hinā se mahke

shafaq kā sahrā utārtā hai sahar se dūlhā banā huā din

'hinā' ye shahroñ kī zindagī ab taḌap ke kartī hai yaad aksar

vo guḌ sī bāteñ vo soñdhī miTTī vo gaañv vaalā sukūñ bharā din

tawil raaton ke ghup andheron ke ba'd nikla hai kya naya din

KHizan ki zardi se zard hota bujha-bujha sogwar sa din

junun ke sahra mein jhulsa-jhulsa sulag-sulag kar guzar raha tha

phir abr-alud ishq suraj ko Dhak ke thoDa bacha gaya din

na jaane kitni bujhi ummiden thin dil bhi shab se bujha hua tha

kiran jo phuTi to jagi aankhon mein surKH Doron sa bhar gaya din

KHushi ke jaisi KHushi nahin thi magar the gham sab ghamon ke jaise

tha ek muflis ke TuTe chhappar mein raat jaisa jala bujha din

ye raat aati hi is liye hai ki din ki qimat samajh mein aae

magar hain kuchh bad-nasib aise ki jin ko sab kuchh mila siwa din

mahakne wali hai raat jaise urus mushk-o-hina se mahke

shafaq ka sahra utarta hai sahar se dulha bana hua din

'hina' ye shahron ki zindagi ab taDap ke karti hai yaad aksar

wo guD si baaten wo sondhi miTTi wo ganw wala sukun bhara din