tazkire mein tere ek nam ko yun joD diya

tazkire meñ tire ik naam ko yuuñ joḌ diyā

dostoñ ne mujhe shīshe kī tarah toḌ diyā

zindagī niklī thī har ġham kā mudāvā karne

chand chehroñ ne ḳhayālāt kā ruḳh moḌ diyā

ab to aa jaa.eñ mujhe chhoḌ ke jaane vaale

maiñ ne ḳhvāboñ ke darīchoñ ko khulā chhoḌ diyā

qadr-dāñ qīmat-e-bāzār se aage na baḌhe

fan kī dahlīz pe fankār ne dam toḌ diyā

us chaman meñ bhī tumheñ chain mayassar na huā

jis chaman ke liye tum ne ye chaman chhoḌ diyā

yuuñ to rusvā-e-zamāna sahī lekin us ne

mere saath aa ke na.e daur kā ruḳh moḌ diyā

maiñ musāfir nahīñ āvāra-e-manzil huuñ 'bashīr'

gardish-e-vaqt ne ye dekh ke dam toḌ diyā

tazkire mein tere ek nam ko yun joD diya

doston ne mujhe shishe ki tarah toD diya

zindagi nikli thi har gham ka mudawa karne

chand chehron ne KHayalat ka ruKH moD diya

ab to aa jaen mujhe chhoD ke jaane wale

main ne KHwabon ke darichon ko khula chhoD diya

qadr-dan qimat-e-bazar se aage na baDhe

fan ki dahliz pe fankar ne dam toD diya

us chaman mein bhi tumhein chain mayassar na hua

jis chaman ke liye tum ne ye chaman chhoD diya

yun to ruswa-e-zamana sahi lekin us ne

mere sath aa ke nae daur ka ruKH moD diya

main musafir nahin aawara-e-manzil hun 'bashir'

gardish-e-waqt ne ye dekh ke dam toD diya